ياريتنا ما نصليش على النبى....
بالراحة اللى كان هيحدفنى بحاجة يستنى شوية....
أوصانا الحبيب عليه أفضل الصلاة والسلام أن نكثر من الصلاة عليه ومن صلى عليه صلاة صلى الله بها عليه عشرة..
ومن ذكرياتى الجميلة ان جدتى لما كانت تحكيلنا حدوتة تقول دايما صلوا على النبى الأول..
أو مثلا وانت ناسى حاجة تصلى على النبى عشان تفتكرها..
لكن فيه بعض المواقف باشوف الناس بتصلى على النبى واقول ياريته ما صلى عليه
دى كارثة فى حق النبى ..
مثلا
- واحد منحرف بيعاكس واحدة يقوم ماسح مسح جغرافى لكل تضاريسها بعينيه ويقول اللهم صلى على جمال النبى .. بقى ده ينفع؟
-واحد عاوز يوصل لك رسالة انك لازم تسيب حقك وتاخد على دماغك وتسكت أو بتنهى عن منكر وهو بيوصلك انك تكبر دماغك..وخلى بالك بقى ان عندنا أصلا الساكت عن الحق شيطان أخرس..
يقوم يقولك ياعم صلى على النبى
-واحد بيفتح معاك نميمة وهتحلو القعدة وانت بتقوله يا عم دع الخلق للخالق يقولك سيبك انت وصلى على النبى ده كيت وكيت وكذا وكذا
- لا لا والافظع بقى زفة فى فرح والكل ناسى يلبس هدومه والراقصة الفاميلى سايز تترنح والكل يصفق صلى على النبى صلى على النبى او صلى صلى واللى ما يصلى مش عارفة ابوه ايه وامه ايه.....
يا جماعة ده ينفع
النبى بيتغنى باسمه فى افراح شعبية بيئة ؟؟!!
- طيب دول ناس بيئة مثلا وياى منهم.
الناس بقى اللى مش بيئة فى اول الفرح (والكل بردوه بينسى يلبس هدومه صيف وشتاء) تلاقى هشام عباس يغنى اسماء الله الحسنى والناس آخر خشوع....وأول ما يقول اللهم صلى على أسعد مخلوقاتك هوباااا تلاقى الكل بيتمايل ويصفق والبعض يرقص..فيه ايه ياناس
ولا اللى بيرقصوا على اغانى سامى يوسف واللى برده بيصلى فيها على النبى..
ياجماعة لازم ذكر النبى صلى الله عليه وسلم يكون له احترامه وآدابه ماينفعش نقرنه بافعال غير مناسبة له.
ارقصوا على حكيم او العنب لكن كله الا ذكر النبى..
وعلى فكرة اللى نبهتنى للنقطة دى صديقة نصرانية أعتز بها جدا كانت مستغربة من ان المسلمين لا يحترمون ذكر نبيهم بالقدر الكافى رغم أنهم بيقولوا أنه أعظم رجل فى البشرية..
مهما اختلفت الافكار او كان لنا اى اعتراض على كلامها ولكن فعلا نحن نحتاج لتنزيه نبينا عن مجالس اللغو ونخشع فى ذكره صلى الله عليه وسلم..
لكن لو كنت واحد من دول فأنا برجوك من فضلك....
والنبى.....اوعى تصلى ع النبى
.
.
.
.
وعذرا يارسول الله
اللهم صلي وسلم وزد وبارك على سيدنا محمد سيد الخلق اجمعين
بقلم حبيبتي
بوكي اجمل واجمد صحفية في المحروسة
